Deagh Chomhairle
"All the great speakers were bad speakers at first." - Ralph Waldo Emerson, sgrìobhadair às na Stàitean Aonaichte.
Thuirt a’ bhana-chleasaiche Scarlett Johansen, agus eadhon "an rìgh", Elvis Presley, gu bheil iad air a bhith iomagaineach nuair a tha iad a’ bruidhinn no a’ dèanamh cleasachd air beulaibh dhaoine. Mar sin chan eil thu nad aonar ma tha snaidhm nad stamaig ’s tu a’ smaoineachadh air bruidhinn ri luchd-èisteachd! Ach na gabh eagal, tha deagh chomhairle againn dhut airson do shocrachadh.
- Bi fiosrach mud chuspair – cha toir e ach beagan ùine leughadh mu dheidhinn ach nì e d’ argamaidean nas làidire agus bidh thu a’ faireachdainn fada nas misneachaile! Tha sinn air puingean tòiseachaidh a thoirt seachad airson earrann nan argamaidean “airson is an aghaidh”.
- Ma tha eòlas agad air do chuspair cha leig thu leas uimhir a sgrìobhadh sìos. ’S toigh le luchd-èisteachd nuair a sheallas tu riutha, ach tha e ceart gu leòr beagan notaichean a bhith agad airson rudan a chur nad chuimhne – ach na biodh an òraid air fad sgrìobhte agad.
- Tha cainnt bodhaige air leth cudromach. Cuimhnich gu bheil thu a’ bruidhinn ris an luchd-èisteachd, chan ann rid notaichean – ruith thairis air d’ òraid ro làimh agus bi misneachail a’ lìbhrigeadh d’ argamaid. Bi cuideachd faiceallach nach bi thu a’ coimhead mar gum biodh tu a’ leughadh bho sgriobt agus leig led argamaid sruthadh cho nàdarrach ’s a ghabhas gun a bhith a’ coimhead gu bheil thu air ullachadh cus.
- Cuimhnich gu bheil thu ann an sgioba, agus gabh brath air. Thigibh còmhla agus tilgibh smuaintean a-steach gus na beachdan as fheàrr a ruighinn – na obraichibh nur n-aonar fad na h-ùine. Bidh sibh uile a’ coimhead, ag obair is a’ faireachdainn nas misneachaile air an latha mhòr.
- Tha aon chleas ann a bhios luchd-labhairt a’ cleachdadh ris an canar “riaghailt trì”. Tha seo a’ ciallachadh gum bi rud sam bith a chanas tu a’ faireachdainn nas làidire ma chuireas tu cuideam air trì uairean. Mar eisimpleir, “An t-eagal, an t-eud ’s an gaol”, “Thàinig mi, chunnaic mi, Thug mi buaidh” no eadhon “Location, Location, Location”!
- Ma tha thu dha-rìribh ag iarraidh puing a bhith èifeachdach, dèan coimeas ri rud a tha calg dhìreach na aghaidh. Mar eisimpleir, “am b’ fheàrr leat corra roth-gaoithe no stèisean niuclasach nad ghàrradh?”
- Na biodh eagal ort ro bhith èibhinn – tha e a’ còrdadh ri daoine. Thuirt an neach-lagha ainmeil, John Mortimer, aig aon uair: “Ma bheir mi gàire air an diùraidh san òraid dheireannaich agam tha e 90% nas coltaiche gum faigh mi co-dhùnadh fàbharach. Ach na cleachd cus fealla-dhà – cuimhnich gu bheil puing chudromach air cùlaibh d’ argamaidean.
- Gabh air do shocair a’ bruidhinn – agus dèan cinnteach gu bheil fios agad dè cho fada ’s a bheir d’ òraid. Feumaidh daoine do chluinntinn, agus feumaidh iad ùine airson cnuasachadh air d’ argamaidean. Seall ri duilleag cruth an deasbaid gus am faic thu dè an ùine a tha a h-uile neach-labhairt a’ faighinn.
Tuilleadh
